மாதவிடாய் காலத்தில் இந்த உணவுகளை தவிருங்கள்...

மாதவிடாய் காலத்தில் இந்த உணவுகளை தவிருங்கள்...!

கியாஸ் நிரப்பப்பட்ட குளிர்பானங்களை வயிற்று வலிக் காரணமாக அதிகம் குடிக்கிறீர்கள் என்றால் அவற்றைத் தவிருங்கள்.அதில் இருக்கும் அதிக அளவிலான கார்போஹைட்ரேட் மற்றும் சர்க்கரை அதிக அளவிலான வயிற்று வலியை உண்டாக்கும்.

மாதவிடாய் காலத்தில் பெண்கள் வயிற்று வலி, வயிறு இறுக்குதல் , தசை வலி, உடல் அசதி போன்ற பிரச்னைகளை எதிர்கொள்ள வேண்டியுள்ளது. இதற்காகப் பலர் வலி நிவாரண மாத்திரைகளை உட்கொள்கின்றனர். ஆனால் மாத்திரைகளை ஒவ்வொரு மாதமும் பயன்படுத்துவது பல பக்க விளைவுகளை ஏற்படுத்தும் என மருத்துவர்கள் எச்சரிக்கின்றனர். மாதவிடாய் வலியைத் தவிர்க்க நம் உணவுப் பழக்கத்திலும் சில கட்டுப்பாடுகளைக் கொண்டு வரலாம். அதற்கு சில உணவுகளைத் தவிர்த்தாலே வலியைக் குறைக்கலாம். அவை என்னென்ன உணவுகள் என்று பார்க்கலாம்.

உப்பு நிறைந்த உணவுகள் : மாதவிடாய் காலத்தில் அதிகமாக உப்பு சேர்த்துக்கொள்வதைக் குறையுங்கள். அதேபோல் சோடியம் நிறைந்த பதப்படுத்தப்பட்ட சிப்ஸ் போன்ற நொறுக்குத் தீனிகளையும் தவிர்க்கவும். இதனால் மாதவிடாய் காலத்தில் ஏற்படும் வயிற்று மந்தம் பசியின்மையைத் தவிர்க்கலாம்.

மைதா உணவுகள் : பாஸ்தா, பீட்ஸா பிரெட் வகைகள், பிஸ்கட்ஸ் , பரோட்டா போன்ற மைதாவில் செய்யப்படும் உணவுகளை முற்றிலுமாகத் தவிர்த்துக்கொள்ளலாம். இது மலச்சிக்கல், வாயுத் தொல்லை , அஜீரணம் மற்றும் இரத்தத்தில் சர்க்கரை சமநிலையின்மை போன்ற பிரச்னைகளை உண்டாக்கும்.

சர்க்கரை உணவுகள் : மாதவிடாய் காலத்தில் சிலருக்குச் சர்க்கரை நிறைந்த உணவு , ஸ்வீட் ஆகியவற்றை உண்ண ஆசை உண்டாகும். ஆனால் அதற்கு இடம் கொடுக்காமல் இனிப்புகளைத் தவிருங்கள். சர்க்கரை நிறைந்த குளிர்பானங்களையும் தவிர்க்கவும். மாதவிடாய் காலத்தில் சர்க்கரை அதிகம் உண்டால் இரத்தத்தில் சர்க்கரை அளவு ஏற்ற இறக்கமாக இருக்கும். இதனால் பதட்டம், திடீரென மன அமைதி, வயிறு இறுக்கிப் பிடித்தல் போன்றவை ஏற்படும்.

எண்ணெய் உணவுகள் : எண்ணெய்யில் பொறிக்கப்பட்ட பஜ்ஜி, பக்கோடா, போண்டா போன்ற உணவுகள் முற்றிலுமாகத் தவிர்க்கவும். அவ்வாறு உண்பதால் அவற்றில் இருக்கும் கெட்ட கொழுப்புகள் உங்களுக்கு வயிற்று வலி, முதுகு வலி ,வயிற்று மந்தம் போன்றவை அதிகரிக்கும்.

பால் , இறைச்சி உணவுகள் : பால் , இறைச்சி போன்ற அதிக கால்சியம் மற்றும் கொழுப்பு நிறைந்த உணவுகளை அதிகமாக எடுத்துக் கொள்வதால் மார்பகங்களில் வலி , உடல் அசதி , தசை வலி போன்றவை ஏற்படும். அதேபோல் அதிகமாக காஃபி, டீ குடிப்பதையும் தவிருங்கள். மாறாகப் பால் இல்லாத பிளாக் டீ, பிளாக் காஃபி அருந்தலாம்.

குளிர்பானங்கள் : கியாஸ் நிரப்பப்பட்ட குளிர்பானங்களை வயிற்று வலி காரணமாக அதிகம் குடிக்கிறீர்கள் என்றால் அவற்றைத் தவிருங்கள்.அதில் இருக்கும் அதிக அளவிலான கார்போஹைட்ரேட் மற்றும் சர்க்கரை வயிற்று வலியை உண்டாக்குவதோடு உடல் அசதியை ஏற்படுத்தும்.

பதப்படுத்தப்பட்ட உணவுகள் : தினமும் உணவோடு ஊறுகாய் உட்கொள்ளும் பழக்கம் இருந்தால் அதை மாதவிடாய் காலத்தில் தவிர்க்கவும். அதேபோல் நூடுல்ஸ், அப்பளம் , சிப்ஸ் , ஃபிரிஜ்ஜில் வைக்கப்பட உணவுகள் எனப் பதப்படுத்தப்பட்ட உணவுகள் எதுவாயினும் அவற்றைத் தவிர்த்தல் நல்லது.

உண்ணக்கூடிய உணவுகள் : மாதவிடாய் காலத்தில் தயிர் , நட்ஸ் , இஞ்சி, பச்சைக் காய்கறிகள், கீரை வகைகள் , டார்க் சாக்லெட், வாழைப்பழம், சோம்பு , ஆரஞ்சு, தர்பூசணி போன்ற நீர் நிறைந்த உணவுகளை அதிகமாக உண்ணுங்கள். இவற்றை மாதவிடாயின் ஐந்து அல்லது மூன்று நாட்களுக்கும் எடுத்துக்கொள்வது உடலுக்கும் நல்லது. மாதவிடாய் பிரச்னைகளையும் தவிர்க்கலாம்